فيه سؤال ديما بنسأله لنفسنا واحنا شغالين تكنيكال وبنتقدم فى الكاريير بتاعنا وهو ايه هى الـ Next step بتاعتى وعايز اكون فين بعد كام سنة بجد مش الاجابة اللى ببقى حافظها وانا داخل انترفيو .
فيه ناس بتحب انها تكمل طول عمرها تكنيكال ويوصلوا لـ Positions زى Consultant مثلا أو Software Architect .
وفيه اللى بيحب البيزنس وبينقل على الـ Sales أو الـ Business Development Management
وفيه اللى بيحب الادارة وبيتجه ناحية الـ Project Management .
كل دى أدوار ممكن تبقى الـ Next Step لـ Technical Engineer والناس بتتخذ أكتر من مذهب فى الموضوع ده ... أكتر مذهبين منهم ان فيه حد بيعتبر الـ Management هى الخطوة الطبيعية لما بعد التكنيكال اللى هو انا اقدم حد فى الشركة واكتر واحد خبرة فيهم فالطبيعى المدير القادم يبقى أنا ... وفيه ناس بتحب حاجة معينة فبتتجه ليها مباشرة من غير ما تعرف هى عبارة عن ايه مثلا أو هل هى تصلح ليها اصلا ولا لأ ... وهل لما تشتغل فيها هتحب شغلها ده ولا لأ.
ففى الحالتين دول بيقوم رايح واخد كورس لشهادة معتمدة زى الـ PMP أو PRINCE2 أو PMI-Agile أو SCRUM وبيدخل الامتحانات بتاعتهم ويبقى Certified فى حاجة منهم لكن هو فى الحقيقة مبقاش Certified انه يبقى مدير مشروع ... هو بقى Certified انه يستخدم Methodology معينة فى ادارة المشروعات وهو شغال مدير مشروع وده فرق كبير جدا.
على سبيل المثال شهادة الـ PMP من متطلبات الامتحان بتاعها انك تدخلها وانت اساسا عندك خبرة كذا سنة فى ادارة المشروعات ... يعنى هى مش شهادة علشان تنفع انك تشتغل مدير مشروع ودى المشكلة اللى بيقع فيها ناس كتير.... انهم لما بيبدأوا الكاريير ده بيدخلوه من النص مش من الأول فبالتالى بيحصل حاجة من الاتنين.
- انه يكون عارف شوية معادلات و Tools & Techniques من الكورس بتاع الـ Methodology اللى درسها لكن مش عارف بيتطبقوا ازاى وامتى وليه؟
- أو انه لما يبدأ الشغل ده يحس انه مش لاقى الـ Passion بتاعه جواه ومش حابب اللى بيحصل واللى المفروض يشتغل فيه.
وده بيكون سببه مغالطه قولناها فى الأول ان فيه ناس بتبقى فاكرة ان ادارة المشروعات هى خطوة متقدمة فى نفس المجال أو الكاريير ... لكن الحقيقة ان ادارة المشروعات بعد كذا سنة من التكنيكال هى Complete shift career طبعا مش معنى كده ان كل الخبرة اللى قبلها بتكون ضاعت فى الهوا لكن دى نقطة هنبقى نتكلم فيها بعدين.
علشان كده فكرت اعمل الكورس ده كاعداد لكل حد حابب يبدأ كاريير ادارة المشروعات بحيث انه يكون المدخل الأول ليه للكاريير ده قبل ما يبقى PMP , PRINCE2 , Agile, SCRUM,….. وكمان علشان يبقى وهو متجه ناحية أى اتجاه من دول يبقى عارف هو رايح فين وانه بيختار الاتجاه الصح فيهم ... وحتى لو هيـ Combine أكتر من حاجة منهم يبقى عارف ايه الـ Added value بتاعت كل حاجة من دى.
هنتعرف على ادارة المشروع من بداية ما كان المشروع ده مجرد فكرة حد حب ينفذها لحد ما بقى System شغال أو مبنى متشطب أو حتى حفلة اتعملت بشكل ناجح.
الـ Target Audience : الناس اللى بتـ Target انها تبدأ فى كاريير ادارة المشروعات أو اللى بتفكر فى كده ومش متأكده هو ده الاختيار الصح ولا الغلط.
اللى درس بالفعل ادارة مشروعات هيبقى بيكرر الكلام ممكن بشكل مختلف أو ببداية من مكان مختلف بس هو مش من الـ Target Audience بتاعتنا لأنه بالفعل سبق بخطوة الناس اللى البرنامج ده معمول ليهم؟
